Арванхоёрдугаар сарын эргэн тойронд
Уншигч танд Хүмүүнлэгийн Ухааны Их Сургуулийн арван хоёрдугаар сарын онцлох үйл явдлуудыг хүргэж байна, хүлээн авна уу.
Алтан үзэг наадам 14 дэх жилдээ
Монгол Улсад Сэтгүүл зүйн мэргэжлээр суралцдаг оюутнуудын шилдэг бүтээл шалгаруулах 14 дахь удаагийн “Алтан Үзэг” наадам энэ сарын 7-ны өдөр "Чингис" зочид буудлын хурлын танхимд шилдгүүдээ тодруулжээ. Энэ жилийн гранфри шагналыг ХИС-ийн "Нонамэ" баг "Эрдэнэт рүү нүүж" телевизийн нэвтрүүлгээрээ авсан байна.
Уг наадам энэ жилээс эхлэн ЕБС-ийн сурагчид эсээ болон нийгмийн рекламын төрлөөр бүтээлээ илгээх боломжтой болсныг энд онцлов.
14-р наадмыг бүтэн үзэх
"ФУТЗАЛ"-ны аварга шалгаруулах тэмцээн
Хүмүүнлэгийн Ухааны Их Сургуулийн "ФУТЗАЛ"-ны аварга шалгаруулах тэмцээн энэ сарын 1-ны өдөр боллоо.
Зургийн эх сурвалж: Оюутны хөгжлийн төв
Тэмцээнд долоон багийн 49 тамирчин оролцож спортын ур чадвараа сорьсноос:
Тэргүүн байранд, М.Мөнхгэрэл ахлагчтай / S-R Psychology club /
Дэд байранд, А.Сумъяабазар ахлагчтай / Орчуулгын Клуб - ХИС /
Гутгаар байранд, Б.Сумъяа ахлагчтай / NUTS Software Club / тус тус шалгарчээ.
3. Залуучуудын Улаан Загалмай клуб- Санта чалленж
" Santa challenge - 2024 " аяны хүрээнд ХИС-ийн дэргэдэх Залуучуудын Улаан Загалмайн гишүүд нэгдэн бяцхан дүү нартаа зориулан бичсэн шинэ жилийн баярын мэндчилгээ бүхий захидлуудын хамт 158 хүүхдийн бэлэг хандивлажээ.
Зургийн эх сурвалж: Улаан загалмай клуб
PSYHEROO 2024
"PSYHEROO 2024" сэтгэл судлаач оюутнуудын мэргэжлийн тэмцээн нь гурав дах жилдээ амжилттай зохион байгуулагдлаа. Энэ жилийн хувьд 7 их дээд сургуулийн 23 баг бүхий 115 оюутан нэгдүгээр шатанд оролцсон байна.
Уламжлал ёсоор хоёрдугаар шатанд шилдэг 10 баг шалгарсны нэг нь Архангай аймгийн оюутнууд байсан төдийгүй, шалгарсан багийнхан хариуцсан багшийн хамтаар дараагийн шатандаа оролцохоор Улаанбаатар хот руу хүлгийн жолоо татжээ.
Энэ сарын онцлох хүмүүсийг манай редакцийн зүгээс онцоллоо.
ОНЦЛОХ БАГШ
Хүмүүнлэгийн Ухааны Их Сургуулийн Сэтгүүл зүй, медиа технологийн тэнхимийн эрхлэгч доктор(Ph.D), Профессор Д.Дагиймаа
Тэрбээр, Монголын сэтгүүл зүйн салбарт Алтан үзэг наадмаар дамжуулан "нар мандуулж" байгаа нэгэн билээ. Уран бүтээлчдийг тайзан дээр байхаар заяагдсан хэмээн нэрийддэг бол түүнийг цэнхэр дэлгэцтэй нягт холбоотой байхаар бүтээжээ. Учир нь өглөөхөн таны үзсэн мэдээний сэтгүүлч нь түүний шавь, аа харин тэр оюутны хичээлийн эхний өдөр "...мэлмэртэл уйлаад нүд минь сохорчихгүй байлтай" хэмээх сургамжит түүхээр эхэлсэн юм.
Хэрэв түүнтэй уулзах хэрэг гарвал, сэтгүүл зүйн тэнхимийн төгсөгчдөөс "Булангийн кофе шоп"-ийн үнэнч үйлчлүүлэгчийг, оюутнуудаас нь "Булангийн Talk Show"-ийн хөтлөгчийг нь сураглаарай. Хариуд нь, Спорт зааланд медал хангинуулаад "үүхүү" гэчихсэн зогсож байгаа нэгнийг эсвэл долоон давхарт кофе, чоно, цэцгэн дундаа 200 эсээ тэвэрчихсэн сууж байгаа нэгнийг зааж өгнө гэдэгт итгэлтэй байна.
14 жил нойргүй хоносон Алтан үзэг наадмын урьд шөнүүд, хэмнэл солигдож шавь нараа үдэж өгөөд нуун байж арчдаг нулимс, унаж яваа нэгнийг ганцхан өгүүлбэрээр босгож ирдэг тэр хатуу үг бүрд тань баярлалаа.
ОНЦЛОХ ОЮУТАН
Бизнесийн удирдлага хөтөлбөрийн 4-р түвшний оюутан М. Ачитмарал "Төслийн менежмент" болон "Бизнесийн сэтгэл судлал" хичээлийн хүрээнд бичил төсөл боловсруулж, бизнес эрхлэн нийт орлого болох 410’000₮-ийг 100% ‘MAGIC CUBE’ төсөлд хандивлажээ.
Тэрбээр, сайн үйлсийн бичил төслийнхөө хүрээнд өөрийн онлайн трифт дэлгүүр болон гар урлалын бизнес эрхэлж байгаа ба "ХИС"-ийн "ОЮУТНЫ ХӨГЖЛИЙН ТӨВ"-д таван хоногийн хугацаанд шинэ хуучин ном, хөзрөн тоглоом, оракл карт болон зүүлт бугуйвч урлан борлуулсан байна.
Уншигч таныг түүний бүтээлээс худалдан авалт хийж, энэ сайн үйлсийн аяны нэг хэсэг болсон гэдэгт итгэлтэй байна.
ОНЦЛОХ БАГ ХАМТ ОЛОН
Санхүүгийн албаны дарга Г.Сэргэлэн, Ч.Ганчимэг, С.Цогзолмаа нарын бүрэлдэхүүн бүхий "Санхүүгийн алба"-ийг энэ сар онцоллоо.
Хэрэв суралцагч та оюутны клубд харьяалалтай аль эсвэл төлбөрийн талаар ямар нэг асуулттай тулгарсан бол тэднийг хэдийнээ сайн танина гэдэгт итгэлтэй байна.
Мэдээлэл хүлээн авах ФБ хуудас: Санхүүгийн алба-ХИС
ОНЦЛОХ АЖИЛТАН
Онцлох ажилтан нь эерэг хандлага, чин сэтгэл, тусч, хариуцлагатай зан чанарыг эргэн тойрондоо үлгэрлэсэн нэгэн байх бол энэ сарын онцлох ажилтнаар ХИС-ийн Мэдээллийн технологийн албаны ажилтан Б.Эрдэнэ-Очир ахыг онцоллоо.
Бэлтгэсэн: Б.Хонгорзул
Commenti